Isa 49 | ZomZIV | STEP | No tuikulhte aw, ka thugen ngai un; a gamla-a om minamte aw, hih thu za un: Ka suah ma-in TOPA in kei hong sam khin hi; ka suaha kipan ka min a lawhsa ahi hi.

1 No tuikulhte aw, ka thugen ngai un;
a gamla-a om minamte aw, hih thu za un:
Ka suah ma-in TOPA in kei hong sam khin hi; ^a
ka suaha kipan ka min a lawhsa ahi hi.
2 Amah in ka kam, namsau tathiamsa bangsak a, ^b
a khut liim nuai-ah kei hong liah hi; ^c
thaltang nawt ngilsa hong suaksak a, ^d
a thaltang bawm sungah hong sel khinkhian hi.
3 Kei kiangah, “Nang, ka thupina kilat nading ^e
ka nasempa Israel na hi hi,” hong ci hi. ^f
4 Ahi hangin kei in, “A thu om lopi-in na ka sem hi;
ka thahatna kimanna nei loin ka zang a, bangmah ka lawhtaak kei hi.
A tuacipi mah TOPA khut muangin ka sema,
ka pahtakman Pasian kiangah om hi,” ka ci hi. ^g
5 Tua hi-a tu-in TOPA -
naubu sungah ama nasem dingin hong bawl a,
Jacob ama kiang tunpihin
amahmah in Israel a kaikhawmpa,
TOPA mitmuhin kei hong kipahtawi nading le ^h
ka thahatna ka Pasian ahi nadingin, ⁱ
6 amah in: “Jacob behte ciahpih kik ding le
ka kepsa Israel-te puak kik ding a sempa na hina
nang adingin neu lua hi. ^j
Ka hotkhiatna leimongte dongin ^k
na puak theih nadingin Gentile-te adingin zong
khuavak kong suaksak ding hi,” hong ci hi. ^l
7 TOPA gen hih ahi hi -
Israel-te Tanpa le Siangtho Pa - ^m
a minamin simmawh a, a kih uh
gam-ukte’ nasempa tungah:
“A muanhuaipa TOPA - nang hong teelpa Israel-te Siangtho Pa hangin ⁿ
kumpite in nang hong muh uh ciangin dingto ding uh a, ^o
kumpi tapate in nang hong muh uh ciangin
a kunsuk ding uh hi,” hong ci hi.

Israel Puahkikna

8 TOPA gen hih ahi hi:

“Kong angvan hunin kong dawng dinga, ^p
hotkhiatna ni-in nang kong huh ding hi; ^q
Keimah in note hong kemin ^r
mite adingin thukhun kong suaksak dinga, ^s
leitang hong puahphasakin ^t
kuama tenlohna mun kong luahsak dinga, ^u
9 thongkiate tungah, ‘Hong paikhia un’ ci-in ^v
khuamial sunga omte tungah, ‘Suakta un,’ ka cisak ding hi.
“Amaute in lampi gei-ah an ne in
mualneu tunga pawnlak khempeuh ah lonona a mu ding uh hi. ^w
10 Amaute gilkial lo dangtak loin ^x
sehnel-gam nisa in a kang kha kei ding hi.
Amaute a khuatuahpa in makaih dinga,
ciktuite gei-ah a pi ding hi. ^y
11 Ka mualliante khempeuh lampi ka suaksak dinga,
ka lam lianpite ka sangsak ding hi. ^z
12 En un, amaute gamlapi panin- ^aa
pawlkhatte leilu-lam pan, pawlkhatte nitumna-lam pan,
pawlkhatte Aswan ^{▼▼49.12 Si Tuipi Laizialte; Masoretic Bupi ah Sinim} kual pek pan hong pai ding uh hi,” a ci hi.
13 Vante aw, lungdamin awng un,
leitung aw, nuam in;
mualliante aw, la sa-in awngkhia un! ^ac
Ahang in, TOPA in a mite hehnem ta in, ^ad
gim thuak mite khuatuah ta ding hi. ^ae
14 Ahi hangin Zion in, “TOPA in kei hong nusia khin a, ^af
Topa in kei hong mangngilh khin hi,” a ci hi.
15 Nu khat in a anga a tawi naungeek mangngilh thei a,
a sunga piang a ta khuatuah lo thei ahi hiam?
Amah in a mangngilh kha zongin
ken nang kong mangngilh kei ding hi. ^ag
16 En in, ka khutpekte ah nang kong gelh kuak zo a;
na kulhte ka mai-ah a om den hi. ^ah
17 Na tapate hong kihei kik uh a,
nang hong siasakte in hong paisan ta uh hi.
18 Dakto inla na kimkot en in;
na tapate kikhawmin nang hong zuan uh hi. ^ai
TOPA in cikhia hi, “Ka nuntakna ka lo hi, ^aj
amaute khempeuh kizepna-in na nei dinga, ^ak
mothak bangin amaute kizepna-in na nei ding hi.
19 “Nang kisia-in hong kilawi a, ^al
na gam gamkhing a suak zongin
tu-in na mite adingin nang na neu lua dinga, ^am
nang hong nawmvalhte gamlapi ah a om ding uh hi. ^an
20 Note dah le kah hun sunga na neih uh
na tate un na zakzakun,
‘Hih mun ko adingin neu lua;
ka ten nading uh mundang hong piakbeh in’ kici lai ding uh hi. ^ao
21 Tua ciangin na lungsimin,
‘Hihte kua hong neihsak hiam?
Kei taselin ka tangkhat a,
hong kinolhin sal ka suak hi.
Hihte a khansuah kua ahi hiam?
Kei guak hong kinusia den a, ^ap
ahi zongin hihte - amaute koi pan hong pai uh ahi hiam?’ na ci ding uh hi,” a ci hi.

22 Thupipen TOPA gen hih ahi hi: ^aq

“En un, Gentile-te ka khut ka van dinga,
mite lamah ka dialkhai ka laamto ding hi; ^ar
amaute in na tapate tawi-in ^as
na tanute liangko mualsuanin hong puak ding uh hi. ^at
23 Kumpite, nang hong don na pate suak ding uh a, ^au
amaute zite nang hong cing na nute a suak ding uh hi. ^av
A maitangun lei si-in na mai-ah kun ding uh a;
na khe-a leivuite a liak ding uh hi. ^aw
Tua ciangin keimah TOPA ka hilam na thei ding uh hi. ^ax
Kei sungah lametna a neite a zahlak kei ding hi,” a ci hi.
24 Galhangpa tung panin kua in sutkhia thei dinga, ^ay
a lungngolpa ^{▼▼49.24 Si Tuipi Laizialte, Vulgate le Syriac (Septuagint tg.25 zong en in); Masoretic Bupi ah thumaante} tung panin kua in galmatte hukhia zo ding ahi hiam?

25 Ahi hangin TOPA gen hih ahi hi:

“Galhangpa tung panin galmatte kilakhia dinga, ^ba
a lungngolpa tung panin kisutkhia taktak ding hi;
nang hong langbawlte ka langbawl dinga,
na tate ka honkhia ding hi.
26 Nang hong nengniamte amaute sa amau mah ka nesak dinga, ^bb
amau sisan zukham bangin ka khamsak ding hi. ^bc
Tua ciangin mihing peuhmah in
keimah, TOPA, note Honpa, ^bd
note Tanpa, Jacob Thahat Pa ka hilam hong thei ding uh hi,” a ci hi. ^be